ანკარაში, თურქეთის პრეზიდენტისა და პალესტინის ადმინისტრაციის ხელმძღვანელის შეხვედრაზე განხილვის მთავარი თემა ახლო აღმოსავლეთის სამშვიდობო პროცესი იყო.
შეხვედრის შემდეგ გამართულ პრესკონფერენციაზე რეჯეფ ტაიპ ერდოღანმა განაცხადა, რომ ისრაელ-პალესტინას შორის უთანხმოების მშვიდობიანი გზებით მოგვარება ორივე მხარისთვის სასარგებლო იქნება.
თურქეთის პრეზიდენტმა სამშვიდობო პროცესის მიმართ მხარდაჭერის სურვილი გამოთქვა. თავის მხრივ, მაჰმუდ აბასმა აშშ-ის პრეზიდენტის სამშვიდობო ძალისხმევაზე და ამერიკის დელეგაციის ვიზიტის შედეგებზე ისაუბრა და აღნიშნა, რომ პალესტინელები მზად არიან ისტორიული სამშვიდობო ხელშეკრულების გასაფორმებლად.
იერუსალიმში მდებარე ალ-აქსას მეჩეთთან ისრაელის მიერ უსაფრთხოების ზომების დაწესების შემდეგ ერდოღანმა თურქებს პროტესტისკენ მოუწოდა, რითაც ისრაელსა და თურქეთს შორის დიპლომატიური დაძაბულობის საფრთხე შეიქმნა. ორ ქვეყანას შორის კავშირები გასულ წელს 6-წლიანი უთანხმოების შემდეგ აღდგა.
2010 წელს თურქეთის გემზე, რომელსაც ღაზას სექტორისკენ ჰუმანიტარული დახმარება მიჰქონდა, ისრაელის საზღვაო ქვეითები შეიჭრნენ. ინციდენტის შედეგად, თურქეთის 10 მოქალაქე დაიღუპა.