„უკრაინისთვის თავდაცვითი ლეტალური იარაღის გადაცემა არ ეწინააღმდეგება დონბასში კონფლიქტის მშვიდობიანი გზით გადაჭრას, პირიქით, ეს არის გადამწყვეტი ფაქტორი ამის მისაღწევად“ - ეს განცხადება ამერიკელმა სენატორმა ჯონ მაკკეინმა საკუთარ ვებგვერდზე გამოაქვეყნა.
რესპუბლიკელი პოლიტიკოსი მიიჩნევს, რომ შეიარაღება აუცილებელია, რათა კიევმა შეძლოს რუსეთის შემდგომი აგრესიისგან თავდაცვა. მაკკეინის განცხადებით, რაც უფრო მაღალი იქნება საფასური, რომელსაც რუსეთის პრეზიდენტი უკრაინის წინააღმდეგ განხორცილებული აგრესიისთვის გადაიხდის, მით უფრო მეტი შესაძლებლობა გაჩნდება, რომ ვლადიმირ პუტინი საკუთარ გეგმებს გადახედავს.
არიზონას სენატორი მიიჩნევს, რომ უკრაინისთვის ლეტალური იარაღის მიწოდება, საერთო ჯამში, დამატებით ზეწოლას მოახდენს რუსეთზე, ასევე ხელს შეუწყობს ე.წ. მინსკის შეთანხმების შესრულებას და რეგიონში სტაბილურობას უზრუნველყოფს.
ჯონ მაკკეინმა ეს განცხადება მაშინ გააკეთა, როდესაც კიევს აშშ-ის თავდაცვის მდივანი ჯეიმს მეტისი სტუმრობს. აგვისტოს დასაწყისში ამერიკულმა ტელეკომპანია NBC-მა გაავრცელა ცნობა, რომ პენტაგონმა თეთრ სახლს მიმართა რეკომენდაციით, აშშ-მა უკრაინას მაღალტექნოლოგიური ლეტალური იარაღი გადასცეს. მათ შორის, საუბარია მობილურ ანტისატანკო სარაკეტო კომპლექსებზე.
ევროპაში NATO-ს შეიარაღებული ძალების ყოფილი მეთაური ჯეიმს სტავრიდისი ამტკიცებს, რომ ეს რეკომენდაცია უშუალოდ პენტაგონის ხელმძღვანელმა ჯეიმს მეტისმა გასცა.