ისნის ბაზრობის ტერიტორიაზე ექსპერტები მუშაობენ.
ხანძრის შედეგად დაზარალებული მოვაჭრეების განმარტებით, ექსპერტები ადგილზე ზარალს რამდენიმე დღის განმავლობაში შეისწავლიან და დასკვნას დადებენ.
ჯიხურების მეპატრონეები ისნის მეორადი ავტონაწილების ბაზრობის ტერიტორიაზე დილიდან მივიდნენ. მათი მთავარი მოთხოვნა ბაზრობის ადმინისტრაციის მხრიდან ზარალის ანაზღაურებაა.
თავის მხრივ ადმინისტრაციაში, კერძოდ, კომპანია ტრანსსერვისში აცხადებენ, რომ კომპანია დაზარალებულებს შესაძლებლობის ფარგლებში მაქსიმალურად დაეხმარება.
დახმარების ერთ-ერთი ფორმა, შემოსავლების სამსახურის თანხმობის შემთხვევაში, შესაძლოა, გარკვეული პერიოდით იჯარის გადასახადისგან მათი გათავისუფლება იყოს.
ადმინისტრაცია ხანძრის შედეგად დაზარალებულებთან შეხვედრას ხვალ კიდევ ერთხელ გეგმავს.