ევროპის საკალათბურთო ჩემპიონატის თასის მოგზაურობა საქართველოში დასრულდა.
ტურის ფარგლებში, ევრობასკეტის ტროფი- ჩემპიონატის მთავარი პრიზი ფუნიკულიორზე გამოიფინა, სადაც ასევე საქართველოს კალათბურთელთა ეროვნული ნაკრების ევროპის ჩემპიონატზე გაცილების ღონისძიება გაიმართა.
საქართველოს კალათბურთელთა ეროვნული გუნდი ევროპის 2017 წლის ჩემპიონატისთვის ბოლო მოსამზადებელ ეტაპზე გადადის.
ილიას ზუროსის გუნდი 22 აგვისტოს საბერძნეთში გაემგზავრება, სადაც აკროპოლისის თასზე 3 შეხვედრას გამართავს. 29 აგვისტოს კი ქართველი კალათბურთელები ისრაელში ჩავლენ, სადაც 31 აგვისტოდან ევროპის საკალათბურთო ჩემპიონატის ბე ჯგუფის მატჩები ჩატარდება.
საქართველოს ნაკრები ჯგუფში უკრაინის, ისრაელის, ლიტვის, იტალიისა და გერმანიის ეროვნულ ნაკრებებთან ერთად იასპარეზებს.
ევრობასკეტის მატჩების პირდაპირ ტრანსლაციას 31 აგვისტოდან 17 სექტემბრის ჩათვლით საზოგადოებრივი მაუწყებელი შემოგთავაზებთ.