გაერო-ს გენერალური მდივანი ანტონიუ გუტერეში მალიში მშვიდობისმყოფელებზე შეიარაღებულ თავდასხმებს გმობს.
წერილობით განცხადებაში გუტერეში აღნიშნავს, რომ თავდასხმა მშვიდობისმყოფელთა მისიაზე შეიძლება ჩაითვალოს სამხედრო დანაშაულად.
მალის ჩრდილოეთ ქალაქ ტიმბუქტუში გაერო-ს მშვიდობისმყოფელების ბაზაზე თავდასხმა 14 აგვისტოს განხორციელდა. მოკლულია შვიდი მშვიდობისმყოფელი.
გაერო-ს ინფორმაციით, დაღუპულები მისიის ადგილობრივი თანამშრომლები იყვნენ. სხვადასხვა სიმძიმის დაზიანებები კიდევ შვიდ ადამიანს აქვს მიღებული. ამასთან, გაერო-ს მშვიდობისმყოფელებმა ექვსი თავდამსხმელი მოკლეს. ეს გაერო-ს მისიაზე ბოლო ერთი დღის განმავლობაში მეორე თავდასხმაა.
პირველი ინციდენტის დროს, შეიარაღებულმა პირებმა მალის ცენტრალურ ნაწილში ცეცხლი გაუხსნეს მშვიდობისმყოფელებს, რასაც მისიის ერთი წევრი ემსხვერპლა. თავდასხმებზე პასუხისმგებლობა არც ერთ დაჯგუფებას არ აუღია.