ნიუ-იორკის ცენტრში, მანჰეტენზე, დონალდ ტრამპის წინააღმდეგ საპროტესტო აქცია გაიმართა. აქციის ასობით მონაწილე მეხუთე ავენიუზე, ტრამპ-თაუერთან შეიკრიბა. დემონსტრანტებს ხელში ეკავათ ტრანსპარანტები წარწერით - „მთავარი ნაცისტი“.
აქციის მონაწილეები მიიჩნევენ, რომ ვირჯინიის ქალაქ შარლოტსვილში მომხდარ არეულობასთან დაკავშირებით დონალდ ტრამპის რეაგირება დაგვიანებული იყო.
შარლოტსვილში ულტრამემარჯვენეებსა და მათ მოწინააღმდეგეებს შორის შეტაკებები 11 აგვისტოს დაიწყო, რა დროსაც დაიღუპა ერთი და დაშავდა 30-ზე მეტი ადამიანი. არეულობის შემდეგ ტრამპმა განაცხადა, რომ გმობს ძალადობასა და სიძულვილს ყველა მხრიდან.
აშშ-ის პრეზიდენტის ამ განცხადებამ "რესპუბლიკელებისა" და "დემოკრატების" მხრიდან კრიტიკა გამოიწვია. მოგვიანებით, თეთრმა სახლმა ნეონაცისტების ქმედებები დაგმო. გუშინ კი შვებულებიდან ვაშინგტნში ნააადრევად დაბრუნებულმა დონალდ ტრამპი ვირჯინიის მოვლენებს გამოხმაურა და რასიზმს ბოროტება უწოდა.