გაპრეზიდენტებიდან 100 დღის შემდეგ, ემანუელ მაკრონი უფრო არაპოპულარული ლიდერია, ვიდრე საფრანგეთის ყოფილი პრეზიდენტი, ფრანსუა ოლანდი. „ფიგაროს“ ცნობით, გამოკითხულთა 36% ემანუელ მაკრონის საქმიანობას დადებითად აფასებს. 5 წლის წინ, სასახლეში შესვლიდან 100 დღის შემდეგ, ფრანსუა ოლანდი 46%-იანი პოპულარობით სარგებლობდა.

გამოკითხულთა მხოლოდ 23% ფიქრობს, რომ მაკრონს ქვეყანა სწორი მიმართულებით მიჰყავს. ოლანდთან შედარებით, დაბალია ნდობის მაჩვენებელიც. 5 წლის წინ ოლანდი 57%-იანი ნდობით სარგებლობდა, მაკრონის მიმართ ნდობას გამოკითხულთა 45% აფიქსირებს.

„ფიგარომ“ საზოგადოებრივი აზრის კვლევის ფრანგული ინსტიტუტის მიერ ჩატარებული გამოკითხვის შედეგები გამოაქვეყნა. ემანუელ მაკრონი საფრანგეთის ყველაზე ახალგაზრდა პრეზიდენტია. ფრანსუა ოლანდი საპრეზიდენტო ვადის ამოწურვის შემდეგ, ყველაზე არაპოპულარულ პრეზიდენტად დაასახელეს.