შსს-ს საგზაო მოძრაობის უსაფრთხოების კამპანიის ფარგლებში, ბათუმში აქცია-პერფორმანსი გაიმართა.
ჯავახიშვილის ქუჩაზე, „ზებრა“ გადასასვლელთან დაიდგა ფორტეპიანო, რომელზეც განთავსებული იყო საგზაო მოძრაობის უსაფრთხოების კამპანიის სტიკერები და წარწერები: აქციის იდეის თანახმად, ფორტეპიანო და მისი კლავიატურა სიმბოლურად „ზებრა“- გადასასვლელს ასახავდა.
აქციის განმავლობაში ნებისმიერ გამვლელს შეეძლო ფორტეპიანოზე დაკვრა და ამ ფორმით საგზაო მოძრაობის უსაფრთხოების კამპანიაში ჩართვა.
აქციას ბათუმის ზაქარია ფალიაშვილის და რევაზ ლაღიძის სახელობის სამუსიკო სკოლების მოსწავლეები, ასევე, გამვლელები შეუერთდნენ და სხვადასხვა ჟანრის ნაწარმოებები შეასრულეს. კომპოზიცია - ბათუმი უსაფრთხო ქალაქი, სამინისტროსგან ბათუმს საჩუქრად გადაეცემა.