მიგვიყვანს თუ არა ეკოლოგიურ კატასტროფამდე დაზიანებული საკანალიზაციო სისტემა - გორში შინდისის ქუჩის, თელავში - სოფელ რუისპირის, ახმეტაში სოფელ ხოდაშნის მცხოვრებლები ფეკალიებს საკუთარი ძალებით ებრძვიან. პერიოდულად ჭას სპეციალური მანქანებით ასუფთავებენ და უსიამოვნო სუნისგან თავისუფლდებიან. ეს პროცესი უკვე მოსახლეობის ცხოვრების ნაწილია.
ზოგიერთ რაიონში უფრო მარტივი გამოსავალი იპოვეს, საკანალიზაციო სისტემა არა კოლექტორებზე, არამედ პირდაპირ მდინარეებზეა მიერთებული და ნარჩენები წყალში ჩაედინება.
გარემოს დამცველები ინფექციური დაავადებების გავრცელების საფრთხეზე საუბრობენ. „მწვანეთა მოძრაობა“ გამოსავალს ახალი კანონისა და რეგულაციების შემოღებაში ხედავს. წყალმომარაგების კომპანიაში კი აცხადებენ, რომ გამწმენდი ნაგებობების მშენებლობა რამდენიმე ქალაქში უკვე დაწყებულია. თუმცა როგორც ჩანს, მოსახლეობას ჯერ მოცდა მოუწევს.