მე ვიბრძოლებ უკრაინაში დაბრუნების კანონიერი უფლებისთვის და მე დავბრუნდები,- ამის შესახებ საქართველოს ყოფილმა პრეზიდენტმა განაცხადა.
მიხეილ სააკაშვილი მისთვის უკრაინის მოქალაქეობის ჩამორთმევას ვიდეომიმართვით გამოეხმაურა, რომელიც ოდესის ოლქის ყოფილმა გუბერნატორმა სოციალურ ქსელში გაავრცელა.
„ეს უკრაინის საზოგადოებისთვის პირდაპირი სიგნალია - აღარ გაგრძელდება თამაში სახელად ”დემოკრატია”.
პოროშენკო საქართველოში ორ ოლიგარქიულ რეჟიმს შორის შეთანხმებისთვის ჩავიდა. შეთანხმებისთვის უკრაინელ პოროშენკოს და ”გაზპრომის” უმსხვილეს კერძო აქციონერ, რუსული პროექტის ქართველ ოლიგარქ ივანიშვილს შორის“,- აცხადებს სააკაშვილი.
მისივე თქმით, სიცრუეა, თითქოს საქართველომ უკრაინას მასთან დაკავშირებით ახალი მასალები გადასცა.
ამასთან, ოდესის ოლქის ყოფილი გუბერნატორი აცხადებს, რომ დევნილის სტატუსის მოპოვებას არ აპირებს.
სააკაშვილის განცხადებით, 24 ივლისს პეტრო პოროშენკომ იმ კომისიის შემადგენლობა შეცვალა, რომელმაც მისთვის მოქალაქეობის ჩამორთმევის გადაწყვეტილება მიიღო.
მისივე თქმით, პოროშენკომ ზღვარს გადააბიჯა, რომელიც, სააკაშვილის განცხადებით, მისთვის ცუდი შედეგით დასრულდება.
„ჩემი გული უკრაინას ეკუთვნის, თქვენი ხელმოწერის მიუხედავად“,- მიმართავს სააკაშვილი უკრაინის პრეზიდენტ პეტრო პოროშენკოს.
მიხეილ სააკაშვილისთვის უკრაინის მოქალაქეობა ჩამორთმეულია უკრაინის პრეზიდენტის ბრძანებით, მოქალაქეობის მიღების პროცედურის დროს არასწორი ინფორმაციის მიწოდების მოტივით.