ამერიკელი კანონმდებლები რუსეთის, ირანისა და ჩრდილოეთ კორეის წინააღმდეგ სანქციების გამკაცრებაზე შეთანხმდნენ.

კანონპროექტი, რომელსაც სენატორები მომავალ კვირას უყრიან კენჭს რუსული ბანკების, ასევე ნავთობისა და ბუნებრივი აირის მომპოვებელი კომპანიების წინააღმდეგ ახალი შეზღუდვების შემოღებას ითვალისწინებს. პროექტში წერია, რომ აშშ-ი განაგრძობს „ჩრდილოეთის ნაკად-2“-ის სახელით ცნობილი მილსადენის წინააღმდეგ გამოსვლას, რადგან „ის ნეგატიურ გავლენას მოახდენს ევროკავშირის ენერგოუსაფრთხოებაზე, ასევე ცენტრალური და აღმოსავლეთ ევროპის ბუნებრივი აირის ბაზრის განვითარებაზე და უკრაინის ენერგეტიკაში მიმდინარე რეფორმებზეც“.

დოკუმენტში ასევე ნათქვამია, რომ პრეზიდენტს აღარ ექნება სანქციების სენატის თანხმობის გარეშე გაუქმების შესაძლებლობა. კანონპროექტი ანალოგიურ სანქციებს ირანისა და ჩრდილოეთ კორეის წინააღმდეგ აწესებს. როგორც სენატორმა ჩაკ შუმერმა CNN-თან საუბარში აღნიშნა, რესპუბლიკელებსა და დემოკრატებს შორის კანონპროექტთან დაკავშირებით თანხმობა არსებობს. რუსეთის პრეზიდენტის პრესსპიკერმა დიმიტრი პესკოვმა რუსეთის წინააღმდეგ სანქციების შესაძლო გამკაცრებას „ძალზე ნეგატიური“ ნაბიჯი უწოდა.
რუსეთის წინააღმდეგ ახალი სანქციების დაწესების შესაძლებლობას გამოეხმაურნენ ევროკავშირშიც. ბრიუსელში ვაშინგტონს აღნიშნული ნაბიჯის ევროკავშირთან კოორდინაციისკენ მოუწოდეს. წინააღმდეგ შემთხვევაში, ევროპელი დიპლომატების თქმით, ევროკავშირის ეკონომიკისთვის ამას შესაძლოა არაპროგნოზირებადი შედეგები მოჰყვეს.