სნოში გახსნილი ახალი სასტუმროს მოგება საქველმოქმედო მიზნებისთვის დაიხარჯება.

ამის შესახებ საქართველოს პრემიერ-მინისტრმა, გიორგი კვირიკაშვილმა სასტუმროს გახსნაზე სიტყვით გამოსვლისას განაცხადა. როგორც პრემიერმა აღნიშნა, ახალ სასტუმროს დიდი მნიშვნელობა აქვს სნოს მცხოვრებლებისთვის.

ამასთან, პრემიერის თქმით, მთელი სასტუმრო რესურსი, რომელიც სნოში არსებობს, პირდაპირ მიებმება გუდაურის პოტენციალს.

„ჩვენ, ჩვენი მხრიდან შეგვიძლია ვთქვა, რომ მომავალ წელს დასრულდება კობი-გუდაურის საბაგირო გზის მშენებლობა, რაც სტეფანწმინდას, სნოს და მთლიანად ამ რეგიონს აქცევს ზამთრის კურორტადაც, გამომდინარე იქიდან, რომ მთელი სასტუმრო რესურსი, რომელიც აქ არსებობს, პირდაპირ მიებმება გუდაურის პოტენციალს. მომავალ წელს ჩვენ ვიწყებთ მლეთა-კობის გვირაბის მშენებლობასაც, რომელიც ორ წელიწადში დასრულდება და 2020 წლისთვის შევა ესქპულატაციაში. ასეთი ერთობით, რომლის მომსწრეც დღეს ყველანი ჩვენ ვართ, ჩვენმა ქვეყანამ შეიძლება დიდ შედეგებს მიაღწიოს და ამის საწინდარი არის ის სიყვარული, რომლის მაგალითსაც ჩვენი პატრიარქის გვაძლევს დღევანდელ დღეს", - აღნიშნა გიორგი კვირიკაშვილმა.

სნოში 34-ნომრიანი სასტუმრო გაიხსნა. ღონისძიებას საქართველოს პატრიარქი, პრეზიდენტი, პრემიერ-მინისტრი, პარლამენტის თავმჯდომარე, დეპუტატები და მინისტრთა კაბინეტის წარმომადგენლები ესწრებოდნენ. სასტუმრო სრულიად საქართველოს კათოლიკოს პატრიარქის ლოცვა-კურთხევით ვახტანგ გორგასლის სახელობის ტაძრის ეზოში მრევლის შემოწირულობით აშენდა. მასში 40-მდე ადგილობრივი დასაქმდება. სასტუმრო პილიგრიმებს მოემსახურება და შემოსული თანხა ადგილობრივებს მოხმარდებათ. დღესვე ახალი წიგნის პრეზენტაციაც შედგა. ოთხტომეული პატრიარქის პირად მიმოწერას აერთიანებს.