სახელმწიფო აუდიტის სამსახური 2017 წლის არჩევნებში მონაწილეობის მსურველ პოლიტიკურ პარტიებსა და დამოუკიდებელ კანდიდატებს მოუწოდებს, საარჩევნო მიზნებისთვის განხორციელებული ხარჯების დეკლარირება დროულად დაიწყონ. შესაბამისი განცხადება უწყების ვებ-გვერდზე გამოქვეყნდა.
პოლიტიკური პარტიების ფინანსური საქმიანობის მონიტორინგის სამსახური ყველა დაინტერესებული პირისთვის კონსულტაციისა და დამატებითი ტრენინგების ჩატარების მზადყოფნასაც გამოთქვამს.
„მოვუწოდებთ ყველა სუბიექტს, ვისაც სურვილი აქვს მონაწილეობა მიიღოს 2017 წლის არჩევნებში, საქართველოს პრეზიდენტის მიერ არჩევნების დანიშვნამდე დაექვემდებაროს პოლიტიკური პარტიებისთვის და დამოუკიდებელი კანდიდატებისთვის კანონმდებლობით დადგენილ წესებს და დარეგისტრირდეს სახელმწიფო აუდიტის სამსახურში, რათა მივაღწიოთ პოლიტიკური ფინანსების მაქსიმალური გამჭვირვალობის სტანდარტს და სამართლიანი საარჩევნო გარემოს ფორმირებას“, - აღნიშნულია სახელმწიფო აუდიტის სამსახურის განცხადებაში.