დემირელის კოლეჯის დაკავებული მენეჯერის, მუსტაფა ემრე ჩაბუქისთვის ლტოლვილის სტატუსზე უარის თქმა ლტოლვილთა და განსახლების სამინისტროს მხრიდან პოლიტიკური გადაწყვეტილება უფროა, ვიდრე სამართლებრივი, - ამის შესახებ საზოგადოებრივს მუსტაფა ემრე ჩაბუქის ადვოკატმა, ვახტანგ კვიჟინაძემ განუცხადა.
ადვოკატის განცხადებით, აღნიშნულ საკითხთან დაკავშირებით, 10 ივლისს, ჩაბუქის ოჯახის წევრებთან ერთად, პრესკონფერენციის გამართვას გეგმავენ. მისი თქმით, პრესკონფერენციაზე საზოგადოებას გააცნობებენ ყველა იმ ფაქტისა და გარემოების შესახებ, რაც, კვიჟინაძის განცხადებით, კიდევ ერთხელ დაადასტურებს, რომ მუსტაფა ემრე ჩაბუქს და მის ოჯახს ლტოლვილის სტატუსი უნდა მიენიჭოს.
ადვოკატის განცხადებით, დაცვის მხარის მოთხოვნა დასაბუთებული, არგუმენტირებული და მტკიცებულებებით გაჯერებულია.
„ჩვენ ვაპირებთ, რომ ყველა საჭირო, პირველი და მეორე ინსტანციის სასამართლოს მივმართოთ, ხოლო საჭიროების შემთხვევაში კი, ადამიანის უფლებათა ევროპულ სასამართლოს. მინდა ხაზგასმით აღვნიშნო, რომ ლტოლვილთა და განსახლების სამინისტროს მიერ, აბსოლუტურად უსაფუძვლოდ, უგულებელყოფილია ყველა ის რისკი, რომელიც საფრთხის ქვეშ აყენებს მუსტაფა ემრე ჩაბუქს და ასევე მისი ოჯახის წევრებს, რომ მათ მიმართ გამოყენებული იქნება წამება და არაადამიანური მოპყრობა, ასევე შეიძლება ისინი ფიზიკური განადგურების საფრთხის წინაშეც კი დადგნენ“, - განაცხადა ადვოკატმა ვახტანგ კვიჟინაძემ საზოგადოებრივთან საუბრისას.
შეგახსენებთ, მუსტაფა ემრე ჩაბუქს ლტოლილთა და განსახლების სამინისტრომ ლტოლვილის სტატუსის მინიჭებაზე 7 ივლისს უარი უთხრა. მოგვიანებით სამინისტრომ გადაწყვეტილების მიზეზები განმარტა.