სახალხო დამცველის წარმომადგენელმა გიორგი ქაჯაიამ სასჯელაღსრულების მე-9 დაწესებულებაში პოლიციის ყოფილი მაღალჩინოსნები ირაკლი ფირცხალავა და გიორგი ცააძე მოინახულა.
როგორც ქაჯაიამ საზოგადოებრივს განუცხადა, მან მსჯავრდებულ ფირცხალავას აჩვენა ის წერილი, რომლითაც ომბუდსმენის აპარატმა დღეს სასჯელაღსრულების სამინისტროსგან საპატიმროს კამერების გუშინდელი ჩანაწერის ამოღება მოითხოვა.
7 ივლისს მეცხრე დაწესებულებაში ირაკლი ფირცხალავა დახურულ სხდომაზე უნდა დაკითხულიყო, თუმცა ის შეუძლოდ გახდა. ფირცხალავას ახლობლებმა განაცხადეს, რომ მას ტრავმული დაზიანებები აღენიშნება და ფირცხალავაზე ფსიქოლოგიური ზეწოლა განხორციელდა.
სახალხო დამცველის აპარატი სასჯელაღსრულების სამინისტროსგან სწორედ ამ ჩანაწერის გადაცემას ითხოვს. ამ მიზნით, აპარატის რწმუნებულმა დღეს საპატიმროში შესვლამდე, სამინისტროს წერილით მიმართა.
გიორგი ქაჯაიას განცხადებით, საპატიმროში შეხვედრაზე ირაკლი ფირცხალავამ მოითხოვა, აპარატის წარმომადგენელი საპატიმროში ხვალაც შევიდეს და მუდმივი მონიტორინგი განახორციელოს სახალხო დამცველმა, რადგან მსჯავრდებული შიშობს, რომ მის მიმართ, შესაძლოა, გარკვეული პროვოკაციები განხორციელდეს.
სახალხო დამცველის წარმომადგენელმა ირაკლი ფირცხალავა და გიორგი ცააძე საპატიმროში გუშინაც მოინახულა და განაცხადა, რომ გარეგნულად ფირცხალავას დაზიანებები არ აღენიშნება, თუმცა საჭიროა ვიდეოჩანაწერის ამოღება.
პოლიციის ყოფილი მაღალჩინოსნები ირაკლი ფირცხალავა და გიორგი ცააძე კორტების სპეცოპერაციის საქმეზე არიან მსჯავრდებულები.