დეკანოზის ოჯახის წევრებთან საპატრიარქოში გამართული შეხვედრის ამსახველი აუდიომასალის ვებგვერდზე დაბლოკვას ტექნიკური გაუმართაობით ხსნის საპატრიარქოს იურისტი.
ედიშერ ქარჩავა აცხადებს, რომ აუდიომასალის მოულოდნელი დაბლოკვა, შესაძლოა, ვებგვერდის სერვერის ტექნიკურმა ხარვეზმა გამოიწვია. მისივე თქმით, პრობლემის გამოსწორებისათვის საპატრიარქოს ვებგვერდის ადმინისტრატორები მუშაობენ.
საპატრიარქომ ოფიციალური განცხადება გუშინ გაავრცელა, სადაც ნათქვამია, რომ დეკანოზ გიორგი მამალაძის ოჯახის წევრებთან საპატრიარქოში გამართული შეხვედრის აუდიომასალის დაბლოკვის მიზეზი გაურკვეველია.
ვარკვევთ ამის მიზეზებს, მანამდე კი დაინტერესებულ პირებს შეუძლიათ იგივე ჩანაწერი იხილონ საპატრიარქოს ტელევიზია „ერთსულოვნების“ გვერდზე.”- ნათქვამია განცხადებაში.