თბილისის სააპელაციო სასამართლომ გიორგი ცააძისა და ირაკლი ფირცხალავას 12-წლიანი პატიმრობის განაჩენი ძალაში დატოვა.
წელიწადნახევრიანი განხილვის შემდეგ, სააპელაციო სასამართლომ განაჩენი დღეს გამოაცხადა.
ფირცხალავასა და ცააძეს 2006 წელს თბილისში კორტების მიმდებარედ, ზურაბ ვაზაგაშვილისა და ალექსანდრე ხუბულოვის განზრახ მკვლელობა ედებათ ბრალად, რის საფუძველზეც პირველი ინსტანციის სასამართლომ 12-12 წლით პატიმრობა მიუსაჯა.
სააპელაციო სასამართლოში დაცვის მხარემ სწორედ განაჩენის გამამტყუნებელი ნაწილი გაასაჩივრა. თავის მხრივ, პროკურატურას გასაჩივრებული ჰქონდა თბილისის საქალაქო სასამართლოს განაჩენის ნაწილი, სადაც კიდევ ერთ ეპიზოდში - ფალსიფიკაციის ბრალდებაში, ფირცხალავა და ცააძე გამართლდნენ. პროკურატურა სააპელაციო სასამართლოში სასჯელის დამძიმებას ითხოვდა.
კრიმინალური პოლიციის და სპეცრაზმის მაღალჩინოსნები განზრახ მკვლელობის ბრალდებას არ ეთანხმებიან და მათ წინააღმდეგ საქმეს პოლიტიკურად მოტივირებულს უწოდებენ. დაცვის მხარე გადაწყვეტილების გასაჩივრებას აპირებს.