რუსული ენერგოკომპანია „ინტერ რაო“ საქართველოს მთავრობასთან ტარიფებზე სტოკჰოლმის საერთაშორისო საარბიტრაჟო სასამართლოში დავას იწყებს.

კომპანიას ელექტროენერგიის ტარიფის მომატება და ლარის გაუფასურებით მიყენებული დანაკლისის კომპენსირება სურს.

ჯერ უცნობია, რა თანხას ითხოვს კომპანია, თუმცა სააგენტო „როიტერი“ სანდო წყაროზე დაყრდნობით წერს, რომ საუბარია 125 მილიონ დოლარზე.

კომპანიამ საქართველოში ორი ჰიდროელექტროსადგური 2011 წელს იყიდა, გარდა ამისა „ინტერ რაო“ 75,11%-იან წილს ფლობს ელექტროენერგიის სადისტრიბუციო კომპანია „თელასში“.

ინფორმაცია საქართველოს ენერგიტიკის მინისტრის მოადგილე მარიამ ვალიშვილმა დაადასტურა.

„ჩვენ უკვე მივიღეთ შეტყობინება საარბიტრაჟო სასამართლოდან და მზად ვართ ჩვენი პოზიცია დავიცვათ“,- აცხადებს მარიამ ვალიშვილი.

ენერგეტიკის მინისტრის მოადგილე ამბობს, რომ ქართულმა მხარემ კომპანიას შესთავაზა, ტარიფთან დაკავშირებით გამოსავლის პოვნის მიზნით მარეგულირებელი კომისიისთვის მიემართა.

„ტარიფთან დაკავშირებით ცვლილებები შესაძლებელია, თუ მსგავს გადაწყვეტილებას კომისია მიიღებს“,- აცხადებს მინისტრის მოადგილე.

მარიამ ვალიშვილი აცხადებს, რომ ქართული მხარის პოზიციები მყარია.

მინისტრის მოადგილე დარწმუნებულია, რომ ამის დამტკიცებას სასამართლოშიც შეძლებენ.