ამერიკის შეერთებული შტატების ელჩმა საქართველოში იან კელიმ საქართველოში სან დიეგოს სახელმწიფო უნივერსიტეტის ექვსი სტუდენტი საელჩოს სპეციალური სტიპენდიით დააჯილდოვა. დაჯილდოების პროცესში მონაწილეობდა საქართველოში სან დიეგოს სახელმწიფო უნივერსიტეტის დეკანი კენ უოლშიც.
აშშ-ის საელჩოს სტიპენდიების პროგრამა სან დიეგოს სახელმწიფო უნივერსიტეტში სწავლის გაგრძელების მსურველი სტუდენტებისთვის 2017 წლის მარტში გამოცხადდა. მასში მონაწილეობის მიღება შეეძლოთ საქართველოში მცხოვრები ეთნიკური უმცირესობისა და სოციალურად დაუცველი მოსახლეობის წარმომადგენლებს, რომლებიც აკმაყოფილებდნენ უნივერსიტეტში მიღებისთვის საჭირო მოთხოვნებს.
სტიპენდია ითვალისწინებს სან დიეგოს სახელმწიფო უნივერსიტეტის მიერ საქართველოში შემოთავაზებულ ამერიკულ საბაკალვრო პროგრამებზე სწავლის სრულ დაფინანსებას.