საქართველოს პროფკავშირები მეშახტეებისა და მაღაროელებისთვის საშეღავათო სისტემის შემუშავების თაობაზე საკანონმდებლო ინიციატივით პარლამენტს მიმართავს და პროექტის ინიცირებისთვის 30 ათასი ხელმოწერის შეგროვებას იწყებს.
საკანონმდებლო წინადადება ითვალისწინებს მაღაროელებისათვის საპენსიო ასაკის 55 წლის განსაზღვრას, სამუშაო ადგილზე დაზიანების შემთხვევაში გრძელვადიანი სასამართლო პროცესის გარეშე საჭირო კომპენსაციის სრული ოდენობით მიღებას, ასევე, ქმედითი შრომითი ინსპექციის შექმნას, რომელიც დამსაქმებელთა პროფკავშირების და მთავრობის მონაწილეობით, სამივე მხარის ჩართულობით იმუშავებს.
„კვირაზე მეტია მივმართე პრემიერ-მინისტრს ინიციატივით, რომელიც შეეხებოდა მეშახტეებისთვის და მაღაროელებისთვის შეღავათების დაწესებას: საშემოსავლო გადასახადის გაუქმებას, საპენსიო ასაკის 55 წლამდე დაწევას და ამავე დროს, სარჩოს, იმ შემთხვევაში, თუ ისინი დაზიანებას მიიღებენ სამუშაო პროცესის დროს. ამავე დროს, შრომის ინსპექციასთან დაკავშირებით, ვფიქრობთ, რომ უნდა ის იყოს სამმხრივი და მუშაობდეს შრომით უფლებებზე. სამწუხაროდ, პასუხი საქართველოს პრემიერ-მინისტრისგან არ მიგვიღია. აქედან გამომდინარე, პროფკავშირების გაერთიანება ინიციატივას ეხმაურება შემდეგნაირად, ვიწყებთ ხელმოწერების შეგროვებას.