ქურთული სამხედრო შენაერთებისა და აშშ-ის კოალიციის ალყის მიუხედავად, საერთაშორისო ტერორისტული ორგანიზაცია ე.წ. “ისლამური სახელმწიფოს” მებრძოლები სირიის ქალაქ რაქას ტოვებენ და მდინარე ევფრატზე გადადიან.

ინფორმაციას რუსეთის თავდაცვის სამინისტრო ავრცელებს. რუსეთის თავდაცვის უწყება სირიის დემოკრატიულ ძალებსა და საერთაშორისო კოალიციას რაქას ვირტუალურ ბლოკირებაში ადანაშაულებს.

მოსკოვში აცხადებენ, რომ საჰაერო-კოსმოსურმა ძალებმა რაქადან პალმირას მიმართულებით ისლამისტების გადაადგილების ორი მცდელობა აღკვეთეს.

საჰაერო იერიშების შედეგად 80 ისლამისტი მებრძოლი, 36 ავტომობილი და რვა საწვავის გადამტანი მანქანა განადგურდა.

გავრცელებული ცნობით, სამმა ავტოკოლონამ ღამის სიბნელით ისარგებლა, რაქას დატოვება მაინც მოახერხა და სამხრეთის მიმართულებით წავიდა.