მანჩესტერის ტერაქტთან კავშირში ეჭვმიტანილების დაკავება გრძელდება. ამ დროისთვის ბრიტანელ სამართალდამცველებს საქმესთან კავშირში ეჭვმიტანილი 6 პირი ჰყავთ დაკავებული. მათ რეიდების დროს მეშვიდე ეჭვმიტანილი ქალიც აიყვანეს, თუმცა მოგვიანებით პოლიციამ ის გაათავისუფლა.

პარალელურად, ლიბიაში თვითმკვლელი ტერორისტის მამა დააკავეს. მედიის ცნობით, 52 წლის რამადან აბადის დაკავების ოპერაციაში ათეულობით სამხედრო მონაწილეობდა. დაკავებულია ტერორისტის უმცროსი, 20 წლის ძმაც, რომელსაც „ისლამურ სახელმწიფოსთან“ კავშირში ადანაშაულებენ. პოლიცია ეჭვობს, რომ ის ტრიპოლიში გეგმავდა ტერაქტის განხორციელებას. მანჩესტერში დააკავეს ბოროტმოქმედის უფროსი ძმა ისმაილი.

მედიაში გავრცელებული ინფორმაციით, პოლიციამ ტერორისტის ბინაში ასაფეთქებელი მოწყობილობის დასამზადებლად საჭირო ნივთიერებები აღმოაჩინა, თუმცა ამ ინფორმაციას, ოფიციალურად არ ადასტურებენ.

რეიდების დროს სამართალდამცველებმა ასაფეთქებელი მოწყობილობაც აღმოაჩინეს, რომელიც გამნაღმველებმა, გაუვნებელყოფის მიზნით, უსაფრთხო ტერიტორიაზე ააფეთქეს.

მანჩესტერში განხორციელებული თავდასხმის გამო, დაგეგმილი კონცერტები გააუქმა პოპ-მომღერალმა არიანა გრანდემ, რომლის კონცერტის დასრულების დროსაც მოხდა მანჩესტერ არენაზე ტერაქტი, რომელსაც, ბოლო მონაცემებით, 22 ადამიანის სიცოცხლე ემსხვერპლა, 120-მდე კი დაშავდა.

წყარო: BBC