ლეგენდარულმა ამერიკულმა როკ-ჯგუფმა „აეროსმიტმა“ საქართველოში ჩამოსვლამდე გრანდიოზული კონცერტი ისრაელში გამართა, სადაც შოუზე დასასწრები 45 000 ბილეთი გაიყიდა.

ბათუმში გამომგზავრებამდე კი, ლეგენდარული ჯგუფის წევრები ისრაელის პრემიერ-მინისტრს შეხვდნენ. ბინიამინ ნეთანიაჰუმ საყვარელ ბენდს 18 მაისს უმასპინძლა და დაინტერესდა, ქვეყნის რომელ რეგიონებს სტუმრობდნენ „აეროსმიტის“ წევრები. იმის სადემონსტრაციოდ, რომ პრემიერი კარგად იცნობს ჯგუფის შემოქმედებას, ნეთანიაჰუმ სტუმრებთან საუბრისას, მათივე სიმღერის სათაური გამოიყენა - რომ არაფერი უნდა გამოეტოვებინათ. „You don't wanna miss a thing!“ - ამ სიტყვებით მიმართა პრემიერ-მინისტრმა ჯგუფის წევრებს. შეხვედრის ამსახველ ვიდეოს პრემიერ-მინისტრის აპარატი ავრცელებს. ვიზიტის ფარგლებში ჯგუფი მკვდარ ზღვას, იერუსალიმს, მასადას და სხვა ღირსშესანიშნავ ადგილებს სტუმრობდა. ბოლოს „აეროსმიტი“ ისრაელში 23 წლის წინ იმყოფებოდა.

დღეს კი, ლეგენდარული ჯგუფი საქართველოში, „ბლექ სი არენაზე“ მართავს კონცერტს.