სახელმწიფო აუდიტის სამსახურში 15-მდე არასამთავრობო ორგანიზაციის წარმომადგენლებისა და ლაშა თორდიას შეხვედრა მიმდინარეობს.
შეხვედრაზე მთავარი განსახილველი საკითხი 13 მაისს შარდენზე, ერთ-ერთ ბარში ლაშა თორდიასა და ყოფილ მთავარ პროკურორ ოთარ ფარცხალაძეს შორის მომხდარი ინციდენტია.
შეხვედრას ესწრება ”საერთაშორისო გამჭირვალობა საქართველოს” აღმასრულებელი დირექტორი ეკა გიგაურიც.
მისი განმარტებით, მნიშვნელოვანია გაირკვეს, თუ რა ფორმით ფიგურირებს აუდიტის დასკვნაში ყოფილი პროკურორის გვარი.
”ეს არის ამ საქმეში ყველაზე მნიშვნელოვანი საკითხი. ვფიქრობ, რომ სხვა საკითხზე არ უნდა გადავიტანოთ ყურადღება, რადგან ეს არის პირდაპირ დაკავშირებული ინციდენტთან. ჩვენ ვხედავთ, რომ დამოუკიდებელი სამსახური საქართველოში სწავლობს კონკრეტულ პრობლემას და ამის გამო ამ სამსახურის უფროსს ექმნება კონკრეტული პრობლემები. აქედან გამომდინარე, ეს იქნება შეხვედრაზე ყველაზე მნიშვნელოვანი საკითხი”,- აცხადებს ეკა გიგაური.