თურქეთში ავარიის შედეგად დაშავებული საქართველოს 5 მოქალაქე ქალაქ რიზეს ცენტრალურ საავადმყოფოსა და საუნივერსიტეტო კლინიკაში რჩება. მათი მდგომარეობა სტაბილურად მძიმეა.
დაზარალებლები ტრაპზონში საქართველოს გენერალურმა კონსულმა და აჭარის ჯანდაცვის მინისტრმა მოინახულეს. მკურნალობისა და შემდგომში სამშობლოში რეანომობილით ტრანსპორტირების ხარჯებს მთლიანად თურქული მხარე საკუთარ თავზე იღებს, სარეაბილიტაციო პროცესს კი აჭარის ჯანდაცვის სამინისტრო დააფინანსებს.
დაშავებულები თურქულ საავადმყოფოებში, სავარაუდოდ, კვირის ბოლომდე დარჩებიან.
შემთხვევა ორი დღის წინ არდაშენის დასახლებაში მოხდა. საქართველოს ექვსი მოქალაქე სამშობლოში მიკროავტობუსით ბრუნდებოდა, სავარაუდოდ, მძღოლმა საჭე ვერ დაიმორჩილა და სახანძრო ავტომანქანას შეეჯახა. შემთხვევის შედეგად საქართველოს ერთი მოქალაქე ადგილზე გარდაიცვალა.