პარტიამ „სახელმწიფო ხალხისთვის“ სახელმწიფო საკონსტიტუციო კომისია დატოვა.
ამის შესახებ პარტიის ლიდერმა, ნიკა მაჭუტაძემ დღეს გამართულ ბრიფინგზე განაცხადა.
როგორც მაჭუტაძემ აღნიშნა, "საქართველოში მიმდინარე ე.წ საკონსტიტუციო რეფორმის მთავარი მიზანია არა კონსტიტუციის, არა მეტი კონსტიტუციური გარანტიის შემქნა ქართული სახელმწიფოსთვის, არამედ მისი მთავარი მიზანია, არაფორმალური მმართველობის განვრცობა, სახელმწიფო დემოკრატიული ინსტიტუტების შთანთქმისა და მოქალაქეების პოლიტიკური უფლების მოსპობის ხარჯზე".
"ხელისუფლების მიერ შემოთავაზებული პროექტით: უქმდება პრეზიდენტის არჩევის პირდაპირი და საყოველთაო არჩევის წესი, საქართველოს მოქალაქეები განიძარცვებიან ქართული სახელმწიფოს მეთაურის არჩევის უფლებისგან. უქმდება ეროვნული უშიშროების საბჭო. ხელისუფლება მიიტაცებს იმ ხმებსაც, რომელიც მას არჩევნებზე არ მიუღია - ანუ გაუნაწილებელი ხმები სრულად მიაქვს ხელისუფლებას. პრეზიდენტის ჩამოერთმევა უზენაესი სასამართლოს კანდიდატურის დასახელების შესაძლებლობა. შეკვეცილია მისი, როგორც მთავარსარდლის ფუნქცია გენერალური შტაბის უფროსის დანიშვნასთან დაკავშირებით", - განაცხადა მაჭუტაძემ.
მისივე თქმით, სახელმწიფო საკონსტიტუციო კომისია ფარსად იქცა, კომისიაში წარმოდგენილ უმრავლესობას საქართველოს მოქალაქეთა მტკიცე და ურყევი პოზიცია არ ესმის.
"კომისიას გადაწყვეტილი აქვს ქართველი ხალხის ნების ნაცვლად კონსტიტუციაში ასახოს, მმართველი პარტიის ვიწრო პოლიტიკური და ბატონი ივანიშვილის პირადი ინტერესები. ამით ისპობა კონსტიტუცია, როგორც საქართველოს მოქალაქეთა პოლიტიკური შეთანხმება თანაცხოვრების ად სახელმწიფოს როგორობის შესახებ", - განაცხადა მაჭუტაძემ.
ნიკა მაჭუტაძემ კოლეგებს საკონსტიტუციო კომისისი დატოვებისკენ მოუწოდა.