აშშ-ის წარმომადგენელთა პალატამ ნატო-სა და აღმოსავლეთ ევროპის ქვეყნების მხარდამჭერ რეზოლუციას მხარი დაუჭირა.
დოკუმენტში საქართველოს მნიშვნელოვანი ადგილი ეთმობა. რეზოლუცია წარმომადგენელთა პალატაში კონგრესმენებმა, სტივ კოენმა და ჯონ შიმკუსმა წარადგინეს.
დოკუმენტი აღიარებს ნატო-ს როლს, როგორც აშშ-სა და ევროპას შორის უსაფრთხოების კუთხით ყველაზე მნიშვნელოვან და კრიტიკულ დამაკავშირებელ რგოლს.
ამასთანავე, რეზოლუცია კიდევ ერთხელ აღიარებს აშშ-ის სრულ მხარდაჭერას ყოფილი საბჭოთა კავშირის ქვეყნების, მათ შორის საქართველოს, უკრაინის, მოლდოვის, ესტონეთის, ლატვიისა და ლიტვის დამოუკიდებლობის, სუვერენიტეტის, ტერიტორიული მთლიანობისა და დემოკრატიული განვითარების მიმართ.
რეზოლუციაში ხაზგასმულია რუსეთის აგრესიული ქმედებები ნატო-ს წევრი და მისი პარტნიორი ქვეყნების მიმართ, მათ შორის აღნიშნულია რუსეთის მიერ 2008 წელს, საქართველოს ტერიტორიის ოკუპაციაც.
დოკუმენტი მოუწოდებს ნატო-ს შეინარჩუნოს „ღია კარის“ პოლიტიკა იმ ქვეყნების მიმართ, რომლებიც აკმაყოფილებენ წევრობისთვის აუცილებელ ყველა მოთხოვნას.
ტექსტის თანახმად, აუცილებელია, აშშ-მ გაზარდოს ცენტრალური და აღმოსავლეთ ევროპის ქვეყნების მიმართ მხარდაჭერა პოლიტიკურ, ეკონომიკურ და თავდაცვის სფეროებში.