საფრანგეთში პრეზიდენტობის კანდიდატთა მეორე დებატები გაიმართა. 11-ვე კანდიდატი სატელევიზიო დებატებში მოსახლეობის წინაშე ერთად წარდგა. გამოკითხვის თანახმად, დებატების დროს ყველაზე დამაჯერებელი პარტია „დაუმორჩილებელი საფრანგეთის“ ლიდერი ჟან-ლუკ მელანშონი იყო. „ვთვლი, რომ საფრანგეთი უნდა გამოვიდეს ევროკავშირის ყველა ხელშეკრულებიდან. დაუშვებელია, რომ ბრიუსელში მყოფი კაპიტალისტები ჩვენ გვკარნახობდნენ, თუ რა სოციალური და ეკონომიკური გარდაქმნები უნდა განვახორციელოთ ჩვენს ქვეყანაში“, - განაცხადა მელანშონმა.

„რესპუბლიკელების“ კანდიდატი ფრანსუა ფიიონი სირიის საკითხს შეეხო და აღნიშნა, რომ საფრანგეთს არ შეუძლია სირიის პრობლემის გადაჭრა, თუმცა რუსეთის მონაწილეობით, საერთაშორისო ალიანსის შექმნა უნდა ინიცირდეს.

„ეროვნული ფრონტის“ ლიდერის, მარინ ლე პენის განცხადებით, საფრანგეთის უსაფრთხოების უზრუნველყოფა უშუალოდ დაკავშირებულია საფრანგეთის საზღვრებზე კონტროლის დაწესებასთან.

დებატებისას მარინ ლე პენმა ფრანსუა ფიონი დაადანაშაულა, რომ მისი პრემიერ-მინისტრობისას „საფრანგეთი ჯიჰადისტებისთვის ერთგვარ უნივერსიტეტად იქცა“.