სასჯელაღსრულების მე-8 დაწესებულებაში შოთა პაკელიანის ადვოკატი გიორგი მახარაძე შევიდა. როგორც მან ჟურნალისტებს განუცხადა, ის პაკელიანთან ორი საკითხის შეთანხმებას აპირებს. ადვოკატის თქმით, ერთ-ერთი ისანი-სამგორის რაიონული პროკურატურის აცილების საკითხია. ადვოკატის თქმით, ამ საკითხით დაცვის მხარე მთავარი პროკურატურისთვის მიმართვას აპირებს, რადგანაც, მიაჩნია, რომ რაიონული პროკურატურა მათ მიმართ სუბიექტურია.
ამასთან, დაცვის მხარე გეგმავს, მიმართოს ჯანდაცვის სამინისტროსაც, რადგან, ადვოკატის თქმით, სასწრაფო დახმარების სამი ეკიპაჟიდან არცერთმა აღმოუჩინა შოთა პაკელიანს სათანადო დახმარება.
გუშინ, სასჯელაღსრულების მე-8 დაწესებულებაში შოთა პაკელიანი გამოიკითხა. ის საგამოძიებო უწყების კითხვებს 5 საათის განმავლობაში პასუხობდა. ადვოკატის განცხადებით, მისი დაცვის ქვეშ მყოფმა იმ პირებზე ისაუბრა, ვინც მას ფიზიკური შეურაცხყოფა მიაყენა.
შოთა პაკელიანი ისანი-სამგორის რაიონის მეშვიდე განყოფილების თანამშრომლებმა რამდენიმე დღის წინ დააკავეს. მისი ოჯახი სამართალდამცავებს პაკელიანის ცემაში ადანაშაულებს, თუმცა შსს აღნიშნულს უარყოფს და აცხადებს, რომ მან სხეულზე დაზიანებები გაქცევის დროს წაქცევის შედეგად მიიღო.