პრემიერმინისტრი მმართველი გუნდის წარმომადგენლებს არაფორმალურ გარემოში, დახურულ კარს მიღმა შეხვდა.

უმრავლესობის წევრებს იმ საკითხების ჩამონათვალი, რაზეც შეხვედრაზე ისაუბრეს, მედიასთან არ დაუსახელებიათ.

ინფორმაცია იმის შესახებ, რომ გუნდმა სხვა თემებთან ერთად პრეზიდენტის არჩევის არაპირდაპირ წესთან დაკავშირებით ვახტანგ ხმალაძის ინიციატივაზეც იმსჯელა, „ქართული ოცნების“ წევრებმა დაადასტურეს.

კონსტიტუციონალისტის წინადადების მიხედვით, პრეზიდენტს აირჩევს კოლეგია, რომელიც შედგება პარლამენტის 150 წევრის და ამდენივე დელეგატისგან, რომლებსაც აფხაზეთის და აჭარის უმაღლესი საბჭოები და საკრებულოები ირჩევენ.

რაც ეხება პრეზიდენტის პარლამენტში გამოსვლის საკითხს, უმრავლესობა ამბობს, რომ ამ თემაზე არ უსაუბრიათ.