საქართველოზე ისაუბრეს ვენაში. ეუთოს მუდმივმა საბჭომ ცხინვალის რეგიონში დაგეგმილი ე.წ. რეფერენდუმის საკითხი განიხილა და ოფიციალური თბილისის მხარდამჭერი განცხადებები გააკეთა.
საგარეო საქმეთა სამინისტროს ინფორმაციით, გამომსვლელებმა საქართველოს სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის მტკიცე მხარდაჭერა კიდევ ერთხელ ერთხმად გამოხატეს.
მუდმივი საბჭოს სხდომაზე ქართულმა მხარემ სამხრეთ ოსეთის/ცხინვალის რეგიონისთვის სახელის გადარქმევის თაობაზე 9 აპრილს ე.წ.რეფერენდუმის დანიშვნა კიდევ ერთხელ დაგმო.
ქართული მხარის განმარტებით, საქართველოს ოკუპირებულ ტერიტორიებზე ნებისმიერი ე.წ. რეფერენდუმის ჩატარება იმ პირობებში, როდესაც ტერიტორიას რუსეთის საოკუპაციო ძალა სრულად აკონტროლებს და ცხინვალის რეგიონიდან ეთნიკური წმენდის შედეგად მოსახლეობა გამოდევნილია, უკანონოა.
სხდომაზე კიდევ ერთხელ აღნიშნეს, რომ აღნიშნული ქმედება რუსეთის ფედერაციის მხრიდან აგრესიის მორიგ აქტს წარმოადგენს და საქართველოს სამშვიდობო პოლიტიკას და საოკუპაციო ხაზებით გაყოფილ მოსახლეობას შორის შერიგებისა და ნდობის აღდგენისაკენ მიმართულ ძალისხმევას რუსეთი საქართველოს ოკუპირებული ტერიტორიების იზოლაციის გაძლიერებითა და მათი ანექსიისკენ გადადგმული ნაბიჯებით პასუხობს.