თურქეთის უმაღლესმა საარჩევნო საბჭომ საკონსტიტუციო რეფერენდუმის ჩატარების თარიღად 16 აპრილი დაასახელა, ამის შესახებ ინფორმაციას BBC ავრცელებს.

სარეფერენდუმო წინადადება თურქეთის კონსტიტუციაში ცვლილებების შეტანას ითვალისწინებს და ინიციატორი მმართველი პარტია და მისი დამფუძნებელი პრეზიდენტი რეჯეპ ტაიპ ერდოღანია.

თურქეთის კანონმდებლობით, კონსტიტუციაში შესატან ცვლილებებს მხარი პარლამენტის 550-დან მინიმუმ 367-მა წევრმა უნდა დაუჭიროს. თუ კანონპროექტს მხარს დაუჭერს 330-დან 367-მდე დეპუტატი, მაშინ საკითხი რეფერენდუმზე უნდა გავიდეს. მიმდინარე ცვლილებებს, რომლებიც რეფერენდუმზე გადის, მხარი პარლამენტის 339-მა წევრმა დაუჭირა.

თუ თურქი ხალხი ცვლილებებს მხარს დაუჭერს, თურქეთის საპარლამენტო მმართველობა საპრეზიდენტოთი შეიცვლება და ერდოღანს ექნება სრული უფლებამოსილება, რომ დააკომპლექტოს მინისტრთა კაბინეტი, გამოსცეს ბრძანებები, დანიშნოს არჩევნები.

როგორც RT წერს, მისი საპრეზიდენტო მმართველობის ვადა 5 წლით გახანგრძლივდება და საშუალება მიეცემა, ამ თანამდებობაზე კიდევ ერთხელ აირჩიონ.



წყარო: BBC, RT