მათ, ვისაც ბავშვის შვილად აყვანა ან მინდობით აღზრდა სურთ, სპეციალური მოსამზადებელი კურსები უნდა გაიარონ და სერტიფიკატი აიღონ. ამის საჭიროება მას შემდეგ დადგება, რაც საკანონმდებლო ცვლილებები განხორციელდება.
დღეს, პარლამენტმა შვილად აყვანისა და მინდობით აღზრდის შესახებ პაკეტი პირველი მოსმენით განიხილა. კანონპროექტის მიხედვით, ერთი და იმავე პირებს, რეესტრში აღრიცხული ბავშვების შვილად აყვანას მხოლოდ 2-ჯერ შესთავაზებენ, ორი უარის შემთხვევაში მშვილებელი აღრიცხვიდან მოიხსნება.
16 წელი მინიმალური, 45 კი მაქსიმალური ასაკობრივი სხვაობა უნდა იყოს მშობელსა და ბავშვს შორის.
მეურვეობისა და მზრუნველობის ცენტრალურ ორგანოში სათათბირო ორგანო, თავსებადობის კომისია შეიქმნება, რომელიც გამონაკლის შემთხვევებში შეიკრიბება იმისათვის, რომ გადაწყვეტილებები ბავშვის საუკეთესო ინტერესების გათვალისწინებით მიიღოს.