საქართველოს ჩოგბურთელთა ნაკრები, დევისის თასის გათამაშებისთვის ემზადება. ევროაფრიკული ზონის, მეორე ჯგუფის შეხვედრები, საქართველოსა და ფინეთს შორის, სამიდან ხუთი თებერვლის ჩათვლით, თბილისის ოლიმპიურ სასახლეში ჩატარდება.
ტურნირის კენჭისყრა 2 თებერვალს საკრებულოს დარბაზში გაიმართება. საქართველოს ნაკრების ვარჯიშს, სპორტისა და ახალგაზრდობის საქმეთა მინისტრი, ტარიელ ხეჩიკაშვილი და ჩოგბურთის ფედერაციის პრეზიდენტი, ალექსანდრე მეტრეველი დაესწრნენ, რომლებმაც ქართველ სპორტსმენებს წარმატება უსურვეს.
საქართველოს ნაკრების შემადგენლობაში, ნიკოლოზ ბასილაშვილი, გიორგი ცივაძე, ზურაბ ტყემალაძე და ვაჟა შუბლაძე ითამაშებენ. ფინეთთან გამარჯვების შემთხვევაში, ჩვენი გუნდი, პირველ ზონაში გადასასვლელად, ლიტვა-მადაგასკარს შორის გამარჯვებულს შეხვდება.
საქართველო-ფინეთის საჩოგბურთო მატჩებზე დასწრება თავისუფალი იქნება. შეჯიბრს სამი დღის განმავლობაში, საზოგადოებრივი მაუწყებელი პირდაპირ ეთერში გააშუქებს.