„ახალგაზრდა იურისტთა ასოციაცია“ ენერგეტიკის სამინისტროს კანონდარღვევაში ადანაშაულებს. მიზეზი, 18 იანვარს ორგანიზაციის მიერ უწყებაში შეტანილი წერილობითი განცხადებაა, რომელშიც ავტორები „გაზპრომთან“ გაფორმებული ხელშეკრულების დეტალების გასაჯაროებას ითხოვდნენ.

არასამთავრობო ორგანიზაციაში ამბობენ, რომ, თუ მოთხოვნილი ინფორმაცია საიდუმლო ინფორმაციას წარმოადგენდა, სამინისტროს „საია-თვის“ საიდუმლოდ მიჩნევის დამადასტურებული ყველა ოფიციალური დოკუმენტის ასლი უნდა მიეწოდებინა. თუმცა, როგორც ორგანიზაციაში განმარტავენ, მათ სამინისტროდან გუშინ, მხოლოდ შემდეგი შინაარსის პასუხი მიიღეს. ციტატა: „მოთხოვნილი ინფორმაცია და დოკუმენტაცია არ არის დაცული სამინისტროში, შესაბამისად, სამინისტრო მოკლებულია შესაძლებლობას, დააკმაყოფილოს თქვენი მოთხოვნა.“

„საია-ში“ ფიქრობენ, რომ სამინისტროს მოქმედება კომპანია „გაზპრომთან“ მიღწეული შეთანხმების საიდუმლოდ მიჩნევის რეალურ საფუძველს კიდევ უფრო ბუნდოვანს ხდის.

ამავე თემაზე კალაძის უწყების მიმართ კითხვები აქვთ „პატრიოტთა ალიანსშიც”. დავით თარხან-მოურავი ამბობს, რომ ენერგეტიკის სამინისტროდან მიღებული პასუხის მიხედვით უწყებას „გაზპრომთან” ხელშეკრულების ასლი არ აქვს.