ზურაბ ჭიაბერაშვილი ჯანდაცვის მინისტრს კლინიკების დასჯის მცდელობაში ადანაშაულებს. ამის შესახებ ფრაქცია „ევროპული საქართველოს“ წევრმა ბრიფინგზე განაცხადა. საუბარია მთავრობის გადაწყვეტილებაზე, რომლის თანახმად, ჯანდაცვის სამინისტრო უფლებამოსილია სასამართლოს დასრულებამდე სადავო თანხები კლინიკებს შემდეგი თვეების ანაზღაურებიდან დაუქვითოს.
ზურაბ ჭიაბერაშვილის განცხადებით, აღნიშნული გადაწყვეტილება არის მცდელობა, კლინიკებს ჩარიცხვა გაუჭიანურდეთ და საბიუჯეტო სახსრები დაიზოგოს.
„ევროპული საქართველოს“ წარმომადგენელი ფიქრობს, რომ ასეთი მიდგომები კლინიკების ფუნქციონირებას ხელს შეუშლის, რადგან სამინისტროს მათთვის ათეულობით მილიონი ლარი აქვს გასასტუმრებელი.
ჯანდაცვის სამინისტროში ახალი დადგენილების შესახებ განმარტებები რამდენიმე დღის წინ გააკეთეს. უწყების ინფორმაციით, ამ ეტაპზე დავა მიმდინარეობს 21-ზე მეტ კლინიკასთან 100-ზე მეტ შემთხვევაზე, ჯამში 8 მილიონ ლარზე.