საკონსტიტუციო კომისიის სამუშაო ჯგუფის შეხვედრა 21 იანვარს გაიმართება. პარლამენტის შენობაში პირველად ადამიანის უფლებებისა და თავისუფლებების, სასამართლო ხელისუფლების, კონსტიტუციის პრეამბულისა და ზოგადი და გარდამავალი დებულებების საკითხთა სამუშაო ჯგუფი შეიკრიბება.
23 იანვარს ადმინისტრაციულ-ტერიტორიული მოწყობისა და ადგილობრივი თვითმმართველობის საკითხთა სამუშაო ჯგუფის სხდომაა დანიშნული, 27 იანვარს საქართველოს პარლამენტის, ფინანსებისა და კონტროლის და კონსტიტუციის გადასინჯვის საკითხთა სამუშაო ჯგუფის სეკრება შედგება.
სულ ბოლოს კი, 28 იანვარს, პრეზიდენტის, მთავრობისა და თავდაცვის საკითხთა სამუშაო ჯგუფის სხდომა გაიმართება.
როგორც ცნობილია ჯგუფების წევრებმა ცვლილებების შესახებ საკუთარი ხედვები უნდა წარმოადგინონ. უმრავლესობაში ამბობენ, რომ კონკრეტულ დეტალებზე საუბარი ახლა ნაადრევია, რადგან შეთანხმების მიხედვით, ამ თემაზე განცხადება კომისიის თავმჯდომარემ უნდა გააკეთოს.
დეპუტატი გია ვოლსკი იმასაც ამბობს, რომ უმრავლესობაში რამდენიმე საკითხზე აზრთა სხვადასხვაობაა, რაც სამუშაო პროცესშიც გამოჩნდება.