ონში გაზიფიცირების სამუშაოები დასრულდა. ენერგეტიკის მინისტრმა კახა კალაძემ ონში ახლადაშენებული გაზგამანაწილებელი ქსელი დაათვალიერა და ქალაქის ცენტრში ჩირაღდანი აანთო.

ონის გაზიფიცირება განსაკუთრებით მნიშვნელოვანია რეგიონის რთული კლიმატური პირობებიდან გამომდინარე.

გაზიფიცირებისთვის საჭირო საპროექტო და სამშენებლო სამუშაოების განხორციელება მნიშვნელოვნად გააუმჯობესებს ონში მცხოვრები 1 855 ოჯახის საცხოვრებელ პირობებს.

ქალაქ ონის სრული გაზიფიცირების პროექტის ფარგლებში აშენდა 38562 მ სიგრძის გაზგამანაწილებელი ქსელი. სამუშაოები საქართველოს ბიუჯეტიდან დაფინანსდა და პროექტის ღირებულებამ 2 მლნ 900 ათასი ლარი შეადგინა.

ონის სრული გაზიფიცირებისთვის საჭირო საპროექტო და სამშენებლო სამუშაოებს შპს „საქართველოს გაზის ტრანსპორტირების კომპანია“, გაზგამანაწილებელი ქსელის ექსპლუატაციას კი კომპანია „სოკარ-ჯორჯია გაზი“ განახორციელებს.

ამასთან, შეგახსენებთ, რომ 2014 წელს, ბუნებრივი გაზის ქსელზე მიერთების ტარიფი 600-დან 400 ლარამდე შემცირდა. მოქალაქეებს შემცირებული ტარიფის გადახდა 25-ლარიანი პორციებით 16 თვის განმავლობაში შეუძლიათ.