სირიის კრიზისზე მომზადებული დოკუმენტი პოლიტიკური უთანხმოების საგანი ხდება.
ალეპოს დაბომბვის შემდეგ ,,ნაციონალური მოძრაობა” პარლამენტს სპეციალური რეზოლუციის მიღებას სთხოვს. ოპოზიციური პარტიის მიერ მომზადებული პროექტის მიხედვით, საქართველოს პარლამენტი სირიის სიდიდით მეორე ქალაქში განვითარებულ მოვლენებში, რუსეთის სამხედრო-პოლიტიკურ ჩარევას მკაცრად გმობს. ქალაქის განადგურების და მოქალაქეების დახოცვის გამო უკიდურეს შეშფოთებას გამოთქვამს და მოსახლეობის ევაკუაციისთვის ჰუმანიტარული დერეფნის გახსნას ითხოვს.
რეზოლუციის პროექტის ავტორები მთავრობას ალეპოს მცხოვრებთა ჰუმანიტარული დახმარებისკენაც მოუწოდებენ. დოკუმენტი უკვე დარეგისტრირდა, თუმცა საპარლამენტო უმრავლესობა და უმცირესობა მისი განხილვის ვადებზე ვერ თანხმდება.