ოთხწლიანი ლოდინი დასრულდა. 2012 წელს დაწყებულმა ხელახალმა ძიებამ ე.წ. ფოტოგრაფების საქმის თავდაპირველი ოფიციალური ვერსია მთლიანად შეცვალა.
ბოლო წლების ერთ-ერთ ყველაზე გახმაურებულ საქმეში ყოფილი მაღალჩინოსნები ამხილეს. დაკავებულია შინაგან საქმეთა სამინისტროს კონტრდაზვერვის დეპარტამენტის ექსჩინოვნიკი, ბრალს დაუსწრებლად წაუყენებენ გლდანის ციხის ყოფილ და ძებნილ დირექტორს.
არ არის გამორიცხული, რომ საქმეში სხვა ექსმაღალჩინოსნების ბრალეულობაც გამოიკვეთოს. მთავარი პროკურატურის ინფორმაციით, 2011 წელს ირაკლი გედენიძე, მისი მეუღლე, გიორგი აბდალაძე და ირაკლი ქურციკიძე 26 მაისის აქციის დარბევის ამსახველი ფოტოების გამო დააკავეს.
გამოძიება მოტივად შურისძიებას ასახელებს. ჯაშუშობაში დადანაშაულებული გედენიძე მაშინ პრეზიდენტის ადმინისტრაციის, აბდალაძე კი საგარეო საქმეთა სამინისტროს ფოტოგრაფი იყო.