ზოოპარკის დირექტორის ზურაბ გურიელიძის განცხადებით, ის აცნობიერებს, რომ მის მიერ მიწოდებული ინფორმაციის შემდეგ, რომლის თანახმადაც, უკვე მტაცებელი ცხოვებელი საფრთხეს აღარ წარმოადგენდნენ, სახელმწიფო სტრუქტურებმა ეს ინფორმაცია გაავრცელეს და ჩათვალეს, რომ საფრთხე აღარ არსებობდა.
ამის შესახებ გურიელიძემ ცოტა ხნის წინ ზოოპარკში განაცხადა.
მისი თქმით, ყველაფერი, რაც მოხდა, რა თქმა უნდა, მისი ბრალია.
„ნამდვილად ძალიან მძიმე შემთხვევა მოხდა და მთლიანად ვაცნობიერებ ამ მძიმე შემთხვევას, მიუხედავად ამისა, მოსახლეობას მინდა მოვუწოდო სიმშვიდისკენ. ზოოპარკის ადმინისტრაცია ძალიან აქტიურად მუშაობს სახელმწიფო სტრუქტურებთან ინფორმაციის გაცემის მიზნით და ჩვენ მიერ მიწოდებული ინფორმაცია მიეწოდება ყველა სამსახურს.
სტიქიის შემდეგ, მიმდინარეობდა დაღუპული და დაკარგული ცხოველების რაოდენობის მონიტორინგი. ყველა ინფორმაციით, რაც გვქონდა, ეს საფრთხე აღარ არსებობდა, რის შესახებაც გუშინაც განვაცხადე. ამის მიუხედავად, შინაგან საქმეთა სამინისტრო მაინც პატრულირებდა პერიმეტრზე, მაგრამ შიგნით შენობაში ძებნა არ ხორციელდებოდა, სამწუხაროდ, მოხდა ისე, რომ ვეფხვი, რომელიც ჩავთვალეთ, რომ იყო მოკლული, აღმოჩნდა ცოცხალი.
ვაცნობიერებთ, რომ ჩემი ინფორმაციის მიწოდებით სახელმწიფო სტრუქტურებმა გაავრცელეს ეს ინფორმაცია. ჩაითვალა, რომ საფრთხე აღარ არსებობს და ეს რა თქმა უნდა, ჩემი ბრალია, თუმცა გარწმუნებთ, რომ ყველაფერს ვაკეთებთ იმისთვის, რომ მსგავსი შემთხვევა არ განმეორდეს“, - განაცხადა გურიელიძემ.
რაც შეეხება გუშინ, პრესცენტრის მიერ გავრცელებულ ინფორმაციას იმის შესახებ, რომ ეძებდნენ ერთ ვეფხვს, ერთ აფთარს და დათვს, გურიელიძე ამბობს, რომ ინფორმაცია ყოველ წუთში იცვლებოდა, ბევრი ცნობა შედიოდა სხვადასხვა წყაროდან ზოოპარკში და საბოლოოდ მათ ინფორმაცია ჰქონდა, რომ მტაცებლები საფრთხეს აღარ წარმოადგენდნენ.
ამ დროისთვის, გურიელიძის ინფორმაციით, ერთი პატარა ვეფხვი და ერთი ზოლებიანი აფთარი იძებნება.
მისი თქმით, აფთარი მოსახლეობისთვის საფრთხეს არ წარმოადგენს და უცნობია, მკვდარი არიან ეს ცხოველები თუ გაქცეულები.
ავტორები: ნინო ჭანია, ეკა გაფრინდაშვილი
#წყალდიდობა
© INFO9