■ თბილისში, 9 აპრილის ბაღში ქართველი მსახიობის ოთარ მეღვინეთუხუცესის ძეგლი დააზიანეს. ძეგლი საზეიმოდ გუშინ გაიხსნა, თუმცა დღეს სკვერში მისულ მოქალაქეებს იგი წარწერის გარეშე დახვდა.

ძეგლის კვარცხლბეკიდან მოხსნილია წარწერა - „ოთარ მეღვინეთუხუცესი“.

შემთხვევის ადგილზე მომიფანტული იყო ასევე ძეგლის გახსნაზე გუშინ მიტანილი ყვავილები და გვირგვინი.
ძეგლის დაზიანების ფაქტზე გამოძიება დაიწყო. როგორც „ინფო 9“-ს შინაგან საქმეთა სამინისტროს პრესსამსახურში განუცხადეს, ფაქტზე გამოძიება სისხლის სამართლის კოდექსის 187-ე მუხლით მიმდინარეობს, რაც სხვისი კუთვნილი ნივთის დაზიანებას ან განადგურებას გულისხმობს.

ამასთან, დაზიანებულ ძეგლს თბილისის მერია აღადგენს.