■ საქართველოს შრომის, ჯანმრთელობის და სოციალური დაცვის მინისტრი დავით სერგეენკო C ჰეპატიტის წინააღმდეგ ახალ აქციას - „ერთად დავამარცხოთ C ჰეპატიტი“ იწყებს.

აქციას საინფორმაციო სახე ექნება და მასში საზოგადოებასთან ერთად, მთავრობის წარმომადგენლებიც ჩაერთვებიან.

აქციის ფარგლებში, ნებისმიერ ადამიანს საშუალება ექნება დააფიქსიროს სამი ძირითადი გზავნილი - თუ როგორ წარმოუდგენია С ჰეპატიტის დამარცხება. გზავნილები მან სოციალური ქსელის მეშვეობით უნდა გაავრცელოს და სხვებიც გამოიწვიოს.

„საინფორმაციო კამპანიას ე.წ. კასკადური ხასიათი ექნება. ჩემი ძირითადი სამი გზავნილია - პირველი, პრევენცია აუცილებელი კომპონენტია; მეორე, ყველა ვისაც სჭირდება მკურნალობა, მიიღებს ამ მკურნალობას; მესამე - დიაგნოსტიკის და მკურნალობის ხარისხი მაღალი იქნება.

ეს სამი კომპონენტი ჯანდაცვის სამინისტროს პიარსამსახურის მიერ გავრცელდება. ვთხოვ ჩემს კოლეგებს, მთავრობის წარმომადგენლებს, რომ აქტიურად გაიზიარონ ეს მოცემულება და საკუთარი შეხედულებები და გზავნილები წარმოადგინონ,“ - განაცხადა სერგეენკომ.

მინისტრმა დღესვე დავალება მისცა სამინისტროს საზოგადოებასთან ურთიერთობის ხელმძღვანელს, რომ დაიწყოს აქციის განხორციელება და სოციალურ ქსელში ძირითადი გზავნილების გაზიარება.

რაც შეეხება C ჰეპატიტის სამკურნალო პრეპარატს, „სოფუსბუვირს“, მინისტრის განცხადებით, ამერიკულ კომპანიასთან კონტრაქტი თებერვლის ბოლოს გაფორმდება და სწორედ ამის შემდეგ მოხდება პრეპარატის ქვეყანაში შემოტანა. სერგეენკო არ აკონკრეტებს, რა ეღირება პრეპარატი, თუმცა აცხადებს, რომ ნებისმიერი მოქალაქისთვის ხელმისაწვდომი იქნება.