■ ტელეკომპანია „მაესტროს“ უკვე ყოფილი ჟურნალისტები არხის დატოვების ერთ-ერთ მთავარ მიზეზად არხიდან ნინო ჟიჟილაშვილის წასვლასა და კოკა ყანდიაშვილის მისვლას ასახელებენ.

„მაესტროს“ საინფორმაციო სამსახურის უფროსის მოვალეობის ყოფილი შემსრულებლის, სოფო კვინტრაძის თქმით, არხიდან ნინო ჟიჟილაშილის წასვლით სარედაქციო დამოუკიდებლობა საფრთხის ქვეშ დადგება.
„კოკა ყანდიაშვილის მოსვლა ბევრ ადამიანს ეჭვებს უჩენს, რომ არხი გარკვეული იდეოლოგიური მიმართულებით გააგრძელებს მუშაობას. ჟიჟილაშვილის წასვლით კი სარედაქციო დამოუკიდებლობა საფრთხის ქვეშ დადგა, ამიტომ მივიღეთ არხიდან წასვლის გადაწყვეტილება“-აღნიშნა კვინტრაძემ „ინფო9“-სთან საუბარში.
სარედაქციო პოლიტიკაში შესაძლო ჩარევაზე საუბროს ტელეკომპანია „მაესტროს“ კიდევ ერთი ჟურნალისტი ნინი მეტრეველი.
„არხის სარედაქციო პოლიტიკა იცვლება და სავარაუდოდ, მითითებებს მოგვცემდნენ. შესაბამისად, „მაესტრო“ დავტოვე“- აღნიშნა მეტრეველმა.
მათივე ინფორმაციით, არხი 20-მდე თანამშრომელმა დატოვა.
გავრცელებული ინფორმაციით, ყანდიაშვილის თოქ-შოუ „მაესტროზე“ ყოველ დღე 20:00 საათიდან 22:00 საათამდე პერიოდში გავა, შესაბამისად, „მაესტროს“ ეთერში აღარ იქნება მთავარი საინფორმაციო გამოშვება „ცხრიანი“, რომლის წამყვანიც ნინო ჟიჟილაშვილი იყო.