რუსეთში, სანკ-პეტერბურგი – მინსკის რეგულარული რეისის ავტობუსში, რუსეთის მოქალაქეები საქართველოს მოქალაქეს თავს დაესხნენ.
55 წლის რუსი, რომელიც მის მეგობრებთან ერთად ნასვამ მდგომარეობაში იმყოფებოდა, საქართველოს მოქალაქის ტელეფონზე ქართულად საუბარმა გააღიზიანა.
BY24.ORG -ის ცნობით, გაღიზიანებული რუსი მოქალაქე, ქართულად მოსაუბრეს უხეშად მიმართავდა და შეურაცხყოფას აყენებდა, რაზეც საქართველოს მოქალაქე მას თავაზიანად მოუწოდებდა, რომ დამშვიდებულიყო.
„ერთ-ერთ მგზავრს ტელეფონმა დაურეკა, ის ქართველი აღმოჩნდა და ტელეფონზე საუბარი ქართულად განაგრძო, რამაც მთვრალი რუსი მგზავრის გაღიზიანება გამოიწვია. გაღიზიანებულმა მგზავრმა ყვირილი დაიწყო: „რუსულ ავტობუსში რუსულად უნდა ისაუბრონ“. რუსი მგზავრის განცხადებით, მას ყველა არარუსი სძულდა“, – იუწყება საინფორმაციო სააგენტო.
გამოცემის ცნობით, „შელაპარაკების დროს ნერვებმა არა ქართველ, არამედ ბელორუს ახალგაზრდა მგზავრს უმტყუნა“. მან მთვრალ მგზავრს სახეში გაარტყა, თუმცა გაღიზიანებული მგზავრი „არარუსების“ მიმართ შეურაცხმყოფელი სიტყვებით მიმართვას კვლავ განაგრძობდა.
საბოლოოდ, ავტობუსის მძღოლმა, დასახმარებლად პოლიციას მიმართა. პოლიციელებმა „ჩხუბისთავები“ ავტობუსიდან ჩაიყვანეს, რის შემდეგაც სიტუაცია განიმუხტა.