ბევრი იფიქრეს, თუ ცოტა, შვეიცარიელმა პოლიტიკოსებმა პროსტიტუციის გარკვეულ ჩარჩოებში მოსაქცევად და მეძავების დაცვის მიზნით ასეთი რამ მოიფიქრეს : ციურიხის რკინიგზის სადგურის უკან მდებარე პარკში გამოიყო ტერიტორია, სადაც პროსტიტუცია ლეგალურია.
No Car, No Sex – გასაგები სიმბოლილიკით გვაუწყებს დაფა შვეიცარიის პირველ შტრიხპლატზე შესვლამდე. ანუ, ვინც აქ მოტოციკლით, ველოსიპედით ან სულაც ფეხით მოვა, ვერაფერს მიიღებს. ხაზი აქვს გადასმული ისეთი ავტომობილსაც, რომელშიც მძღოლის გარდა სხვა მგზავრიც იქნება. ”ავტომობილში მხოლოდ მძღოლი უნდა იყოს, არანაირი წყვილი და ჯგუფური სექსი,” – ამბობს დაცვის თანამშრომელი.
ციურიხის პირველ Drive-in-sex პარკში ყველაფერი შვეიცარიული სიზუსტითაა მოწესრიგებული. კლიენტები პარკში წრეზე მოძრაობენ, მეძავთან ურთიერთობის მსურველი ავტომობილში რჩება, გააჩერებს მანქანას, ჩამოწევს ფანჯარას, გაუმხელს სურვილებს, მოილაპარაკებენ ფასზე და მეძავი მანქანაში ჯდება. ამის შემდეგ მძღოლმა სპეციალურ ბოქსებს უნდა მიაშუროს და შეარჩიოს თავისუფალი ბოქსი. აქტი მანქანაში მიმდინარეობს, რომელიც ბოქსში დგას, ბოქსი კი დაცულია ცნობისმოყვარე ადამიანების მზერებისგან.
”ბოქსები ისეა მოწყობილი, რომ მეძავს შეუძლია, საჭიროების შემთხვევაში მანქანიდან გადმოვიდეს, ან გამოიყენოს SOS-სისტემა. აქ მეძავები მაქსიმალურად დაცულები არიან. SOS-ღილაკზე დაჭერის შემთხვევაში ბოქსში სპეციალური განათება ჩაირთვება, რითაც უსაფრთხოების სამსახური მიხვდება, რომ რაღაც წესრიგში არაა და პოლიციას გამოიძახებს. იქვეა საშხაპეებისა და საპირფარეშოების პავილიონიც,” – აცხადებს ქალთა დაცვის ორგანიზაცია Flora Dora-ს თავმჯდომარე ურსულა კოხერი.