უახლოეს მომავალში ევროპარლამენტში დეპუტატების ჯგუფი შეიქმნება, რომელიც ოკუპირებული აფხაზეთის „კეთილი ნების ელჩების“ მიერ ინიცირებულ ჰუმანიტარულ საკითხებზე იმუშავებს - ინფორმაციას აპსნი.რუ ავრცელებს.
გამოცემის ინფორმაციით, უკვე ცნობილია, რომ ე.წ. სამუშაო ჯგუფში პოლონელი პოლიტიკოსი იანუშ კორვინ-მიკე შევა. იანუშ კორვინ-მიკე, უკრაინაში 2015 წლიდან პერსონა ნონ გრატად არის გამოცხადებული. მის წინააღმდეგ უკრაინაში სისიხლის სამართლის საქმეც აღიძრა, კანონდარღვევით, ოკუპირებულ ყირიმში რუსეთის ვიცე-პრემიერ დიმიტრი როგოზინთან ერთად ვიზიტის გამო.
"მხარს ვუჭერ ამ ინიციატივას, რადგან ეს ძალიან კარგი წამოწყებაა. ბევრმა პოლონელმა არ იცის, ვინ არიან კავკასიელები, რომ აფხაზები, ქართველები და სომხები ქრისტიანები არიან. იქ ძალიან ბევრი ძეგლია, ეკლესია და აუცილებელია მათი განადგურებისგან დაცვა. აუცილებელია, ომის შემდეგ, აფხაზეთის ქრისტიანული მემკვიდრეობის დაცვა“ - აცხადებს ევროდეპუტატი იანუშ კორვინ-მიკე, წერს ოკუპირებული აფხაზეთის მედია.
შეგახსენებთ, რომ ოკუპირებული აფხაზეთის „კეთილი ნების ელჩებმა“ ვიდეო მიმართვა გაავრცელეს, რომელითაც იუნესკოს სთხოვენ დახმარებას, რეგიონში კულტურული მემკვიდრეობის ძეგლების შესანარჩუნებლად.
აფხაზურ მედიაში ამ ინფორმაციის გავრცელებას ქეთევან ციხელაშვილი გამოეხმაურა.