კალიფორნიის შტატის ჩრდილოეთ ნაწილში, ტყის ხანძრის შედეგად, 10 ადამიანი დაიღუპა. ინფორმაციას ამის შესახებ ტელეკომპანია ABC News-ი ავრცელებს.

ამასთან, ადგილობრივი ხელისუფლების მიერ გამოქვეყნებული ბოლო მონაცემებით, ცეცხლმა 1500-ზე მეტი შენობა გაანადგურა.

ცეცხლი სულ 36 000 ჰექტარზეა გავრცელებული. კალიფორნიის რამდენიმე რაიონში ტყის ხანძრის გამო, გუბერნატორმა ჯერი ბრაუნმა საგანგებო მდგომარეობა გამოაცხადა. სტიქიის ზონიდან ევაკუირებულია 20 000-ზე მეტი ადამიანი. ევაკუაცია განხორციელდა ორი საავადმყოფოდანაც.

ხანძრის გამო, 114 000 აბონენტი ელექტროენერგიის გარეშეა დარჩენილი.

საგანგებო სამსახურების განცხადებით, ცეცხლის ჩაქრობის ოპერაციას ძლიერი ქარი აფერხებს.