შინაგან საქმეთა სამინისტროს ინფორმაციით, სარფის საბაჟოზე დღეს მომხდარ ინციდენტთან დაკავშირებით, რომელიც აჭარის ტელევიზიის გადამღები ჯგუფის მიმართ თურქი მებაჟეების მხრიდან შესაძლო ფიზიკურ ძალადობას ეხება, უკვე დაიწყო გამოძიება. საქმე სისხლის სამართლის კოდექსის 126-ე მუხლით აღიძრა, რაც ძალადობას გულისხმობს.
აჭარის ტელევიზიის გადამღები ჯგუფი-ჟურნალისტი ჯენი კვანტალიანი და ოპერატორი ანდრო ქაჩიბაია პოლიციის გონიოს განყოფილებაში გადაიყვანეს.
საქმესთან დაკავშირებით სამართალდამცველები მათ დაკითხავენ. დაგეგმილია ასევე ექსპერტიზაც.
პოლიციაში გადამღები ჯგუფი აჭარის ტელევიზიის დირექტორის ნათია კაპანაძის თანხლებით მივიდა. მას დღეს სარფში თურქეთის გენერალური კონსული იასინ თემისქანი შეხვდა, რომელმაც განაცხადა, რომ ფაქტის შესწავლა თურქმა სამართალდამცველებმაც დაიწყეს.