სამწლიანი სასამართლო დავის შემდეგ, „ქრისტიან-დემოკრატიულმა მოძრაობამ“ ყრილობა გამართა და პარტიის ახალი თავმჯდომარე აირჩია. გოჩა ჯოჯუას პარტიის წევრებმა მხარი ერთხმად დაუჭირეს.

„ქრისტიან-დემოკრატიული მოძრაობა“ სასამართლო დავაში ნინო ბურჯანაძესთან სამი წლის განმავლობაში იმყოფებოდა. საბოლოოდ, უზენაესმა სასამართლომ 2014 წლის 6 მაისის ყრილობის შედეგები, სადაც პარტიის თავმჯდომარედ ნინო ბურჯანაძე დასახელდა, ბათილად ცნო და ახლა პარტია პოლიტიკურ ასპარეზზე ახალი ხელმძღვანელობით გამოჩნდება.

დღევანდელ ყრილობაზე პარტიის 1000 წევრიდან რეგისტრაცია 516-მა გაიარა.